Datorren igandean, otsailak 2, Euskotrenek Bilboko tranbiaren maiztasunak areagotuko ditu, egun horretan, San Mamesen, gaueko 21:00tan hasita Athletic eta Real Madrid taldeen aurkako partidara doazen pertsonen joan-etorri beharrak betetzeko.

Horrela, Euskotrenek erabiltzaileei 15 minutuz behineko ohiko zirkulazioaz gain, zenbait zerbitzu berezi eskainiko dizkie 19:59an, 20:14an eta 20:44an Pio Barojatik Ospitalerantz eta beste bat Atxuritik Ospitalera 20:21ean.

Norgehiagoka amaitu ondoren, tranbiaren zirkulazio berezia martxan jarriko da Ospitaletik Atxurirantz 22:51n eta 23:03an ohiko zerbitzua indartzeko.

Unitate berezi horiei esker geraleku horietan dauden bidaiari guztiak eraman ahal izango dira.

Bilboko tranbiarako sarrera errazagoa eta azkarragoa izan dadin,  Euskotrenek ordaintzerakoan Barik erabiltzea gomendatzen du. Informazio gehiago lortzeko asmoz, erabiltzaileek 902 543 210 telefono zenbakira dei dezakete edota tranbiaren www.euskotren.es web gunea kontsulta dezakete.

•Ingurumen eta Lurralde Politika Sailak Orioko kontradikea konpontzen hasi da

Eusko Jaurlaritzaren Ingurumen eta Lurralde Politika Saila Bizkaiko eta Gipuzkoako portuak prestatzen ari da, asteburu honetarako iragarritako denboraleari begira. Itsas Kapitaintzaren gomendioei jarraiki, Bermeoko portuan eten egingo da merkataritza-ontzien zirkulazioa, larunbateko 15:00etatik aurrera. Aurreikuspen meteorologiko berrienen arabera, Bermeoko portuak itxita egon beharko du astelehenera arte, otsailaren 3ra arte, alegia. Kasu horietan, Deustuko kanalera joatea erabaki ohi dute arrantzaleek.

Orioko kontradikean ere prebentzio-neurriak hartzen ari dira, zenbait matxura baititu asteazkeneko denboralearen ondorioz. Otsailaren 1erako, larunbata, aktibaturiko alerta laranjaren aurreikuspena ezagututa, presazko lanak egiten ari dira itsasbeheretan, pitzadura areagotu ez dadin eta nabigazio-kanala inbaditzea saihesteko. Lanak gaur goizean hasi dira, 06:30ean, 04:40ko itsasgoraren ostean. Ordu horretan, Eusko Jaurlaritzako portuetako langileek itsasoak sekzioa erabat puskatu zuen eta nabigazio-kanalean sartu zen egiaztatu dute, baina ez da halakorik gertatu.

Eusko Jaurlaritzaren Azpiegituretako zuzendari Almudena Ruiz de Angulok honako hau adierazi du: «Haustura gertatzen bada, eta nabigazio-kanalean sartzen bada, balizatu egin beharko da estutzea seinaleztatzeko. Oraintxe bertan, Orioko biltegietan bi seinaleztapen-buia eta bi "hildako"edo buia lastatu daude, beharrezkoa izanez gero, kanalaren estutzea seinaleztatzeko erabiliko ditugunak».

«Dikeak ondo jasan du gaur goizaldeko 04:40ko itsasgora, eta ez du nabigazio-kanala inbaditu, Azpiegitura Zuzendaritzako teknikariek 06:30ean eginiko ikuskapenean egiaztatu dutenez. Harri-lubeta handiena ezpondan birkokatu dute, eta txikiena (5 tona) gailurrean, kontradikearen goialdean hormigoia bota ahal izateko oinarri bat berreraikitzeko. Era berean, sulfatoekiko erresistentea den zementua eta gogortzailea dituen HM-30 hormigoia botako dute kontradikearen gailurra iragazgaizteko. Itsasbehera 10:50ean denez, hormigoiketa 09:00ak baino lehen hasi da, urak hartzeko aukera egon arren», zehaztu du Ruiz de Angulok.

Eusko Jaurlaritzaren Ingurumen eta Lurralde Politika Saila kalteturiko kontradikea presaz konpontzeko lanak prestatzen ari da, Orioko portura sartzeko nabigazio-kanalean behar adinako segurtasuna bermatzeko. Horretarako, gutxi gorabehera 600.000 eurotan baloraturiko larrialdi-espedientea igorri du. Kontradikearen sekzioa handitzea aurreikusi dute, azken urteetan izandako denboraleak direla-eta, komenigarria baita kalkulu-hipotesien ohiko parametroak handitzea.

«Urtarrila eta otsaila -azaldu du Eusko Jaurlaritzaren Azpiegituretako zuzendariak- hil bereziki zailak izan ohi dira Euskadiko portuetan, gure arrantzale eta itsasgizon adituek ohartarazi digutenez; izan ere, eguzkia Lurretik gertuago egoten da neguan, eta horri asteburu honetan gertatuko den ilargiaren lerrokatzea eransten badiogu, ziur dakigu marea biziak sortuko direla, eta haizearen indarrarekin lagunduta, olatu izugarriak izango ditugula. Datu horiek duela 30 urte baino gehiago Estatuko portuek zein Euskalmetek gure kostalde parean ezarritako buiek jasotako olatu-erregistroen bermea dute».

Argitaratutako dokumentuak honakoak biltzen ditu; batetik, Urdaibaiko Biosfera Erreserbaren Erabilpenerako eta Kudeaketarako Egitamu Gidaria (EKEG) berrikusteko prozesuaren datu orokorrak, herritarren parte-hartzeari dagokionez, eta, bestetik, prozesuaren ondorio nagusiak.

• "Naturaren alde lan eginez, epe luzerako onurak lortzen ditugu, denborak aurrera egin ahala irauten duten onurak".
• Errekonozimendua Begoñazpiko Ana Ortuondori eta Burguko Tecnoclubeko Luis Gómezi, gazteen artean ingurumena sustatzeagatik.
• Honako ikastetxe hauetako neska-mutilak saritu dituzte: Zaldupe, Alonsotegi, Ntra. Sra. del Carmen (Portugalete), La Anunciata, Franciscanas de Montpellier, Bizkaia eta Aita Larramendi Ikastola.

Ingurumen eta Lurralde Politikako sailburu Ana Oregik gaur goizean nabarmendu duenez, 24.000 gaztek eta irakaslek parte hartu dute euskal kostaldeak eta ibaiak aztertzeko, analizatzeko eta kontserbatzeko Aztertu programan. "Naturak inguruarekiko konponbide errentagarri eta jasangarriak eskaintzen dizkigu, beraz, bere alde lan egiten badugu, denborak aurrera egin ahala irauten duten onurak lortzen ditugu", adierazi du Oregik.

Bilboko Bilborock aretoan banatu dira Aztertu sariak, eta Oregiz gain, alkateorde José Luis Sabas, sailburuorde Josean Galera eta Eusko Jaurlaritzako Natura Inguruneko zuzendari Amaia Barredo izan dira. Ekitaldian, errekonozimendu berezia eskaini zaie Begoñazpi zentroko Ana Ortuondori eta Burguko Tecnoclubeko Luis Gómezi, gazteen artean ingurumena sustatzeko egindako lanagatik.

Oregik Mesedeetako Eliza zaharrean bildu diren berrehundik gora ikasleei nabarmendu dienez, "Eusko Jaurlaritzaren ibilbide-orrian, gure ekosistemen kontserbazioa nabarmentzen da, ingurumen-arazoei konponbideak proposatzen dizkietenak, esaterako, klima-aldaketari eta ur eta airearen kalitateari, basoek CO2-a naturalki xurgatzeari edo urak naturalki arazteari esker".

"Aztertu programaren Azterkosta eta Ibaialde kanpainetan iaz egin zenuten ahalegina errekonozitzeko unea iritsi da, bai eta gure erkidegoko ikastetxeetako ikasleak zareten, elkarteetako kideak zareten edo, besterik gabe, indibidualki parte hartu duzuen egiaztatzeko unea ere.

Ingurumen eta Lurralde Politikako sailburuak naturarekiko zaletasuna duten gazteei esan dienez, "hemendik urte batzuetara Deba ibaiak, Arreo lakuak edo Karraspio edo Gorlizko hondartzetako arrokek itxura mantendu edo hobetu badute, hein batean, zuen lan eta ahaleginari esker izango da".

Urko Ariztik aurkeztu du ekitaldia, eta Zirkalek parte hartu du. Gainera, Eva Menak graffiti bat egin du, eta bertaratutakoen arreta erakarri du. Horietako askok Bizkaiko Arkeologia Museoa bisitatu dute ondoren.

IBAIALDE sarien zerrenda

Modalitatea: marrazketa
1. kategoria. Irabazlea: Maialen Arrizabalaga (Zaldupe HLHI)
Accesita: Ione Orobio (Alonsotegi HLHI)
2. kategoria. Irabazlea: Andrea Trujillo (Ntra. Sra. Carmen HLBHIP, Portugalete)
3. kategoria. Irabazlea: Alba Hernández (La Anunciata HLBHIP)
Accesita: Izaskun Martín (La Anunciata HLBHIP)
Modalitatea: argazkilaritza
1. kategoria. Irabazlea: Eneko Fernández Peña (indibiduala)
2. kategoria. Irabazlea: Melanie Fernández (Franciscanas de Montpellier HLBHIP)
3. kategoria. Irabazlea: Alfonso de Andrés (indibiduala)

AZTERKOSKA sarien zerrenda

Modalitatea: marrazketa
1. kategoria. Irabazlea: Nahia Mendibil (Etxaurren Ikastola HLHI)
Accesita: Nabil Sossou (Kurutziaga Ikastola HLBHIP)
2. kategoria. Irabazlea: Itzel Torres (La Anunciata HLBHIP)
Accesita: Alazne Nistal (Bizkaia HLBHIP)
3. kategoria. Irabazlea: Maider Quintanilla (La Anunciata HLBHIP)
Modalitatea: argazkilaritza
1. kategoria. Irabazlea: Aitana Sanchez (indibiduala)
2. kategoria. Irabazlea: Janire Huizi (Aita Larramendi Ikastola HLBHIP)
3. kategoria. Irabazlea: David Rodriguez (indibiduala)

Gobela ibaiaren ibilgu berria egiteko pantailak bukatu berri ditu URAK Cristobal Valdéseko gainezkabidetik eta Gobelako Metro geltokira doan zubiaren arteko eremuan. Behin lan hauek bukatuta, hurrengo hilabeteetan URAk ekingo dio ezkerraldeko ibai ertzeko oinezkoentzako ibilbidearen urbanizazioari, Erromoko Polikiroldegiaren aurrean kokatzen dena.

Gaur arte URAk 4,3 miloi euro inbestitu ditu Getxon, Gobela Ibaiko egokitze hidrauliko eta ingurumena berreskuratzeko 1. Fasean (Errekagane tartean, Cristobal Valdés-eko gainezkabidetik La Avanzada-rainokoa), eta lanean dihardu 1. Faseko lan hauek datorren udazkenerako bukatzeko, planifikaturik zegoen moduan eta 2013.ko uholdeen inguruko Informazio-Batzorde berezian publikoki azaldu zen moduan.

Ibilbidea birjartzeaz gain, ibilgu berria egiteko pantailak jartzeari ekingo zaio Gobelako Metro geltokira doan zubitik eta Villa Plentzia arteko eremuan. Horretarako lanetan erabiltzen ari den makinaria astuna bertara eramango da.

Eusko Jaurlaritzako Ingurumen eta Lurralde Politikako sailburu Ana Oregiren esanetan, "goiz da oraindik asteburuko denboralearen ondoren euskal portuetan egin behar diren konponketen behin betiko kostua zehazteko". Sailburuak esan du egokiena itxarotea dela datuak hurrengo egunetan handitu daitezkelako. Izan ere alerta laranja aurreikusita dago eta orain, sailburuaren ustez, "premiazkoa da" kaltetuak izan diren babes kai-muturrak konpontzea. Oregik gizarteari dei egin dio administrazioetatik datozen segurtasun arau zein aholkuak betetzeko biharko eta etziko itsasoaren egoera "oso konplexua" izango baita.

Ingurumen eta Lurralde Politikako sailburu Ana Oregi Gobernu Kontseiluaren osteko prentsaurrekoan agertu da euskal portuek jasan dituzten behin-behineko kalteak jakinarazteko.

(Informazio zehatzagoa erantsitako dokumentuan)

• Euskadi errausketa-baldintza zorrotzenetakoak eskatzen dituen Europako lurraldea da
  
• Guztira, 21 errausketa-labe daude EAEn: Araban, 4; Bizkaian, 8 (horietako bi udalarenak) eta, Gipuzkoan, 9 (hiru, udalarenak).
  
• Urtean 9.300 errauste egiten dira Euskadin

Eusko Jaurlaritzaren Ingurumen eta Lurralde Politika Sailaren iritziz, «Funeraria Bilbaína enpresak Bilboko instalazioan gauzatzen duen jarduerak ingurumen-araudia betetzen du, eta ez du eragin kaltegarririk inguruko airearen kalitatean». Horretarako, instalazioan eginiko sei txosten hartu ditu erreferentzia gisa. Txosten horietako lehenengoa proba-fasean egin zen, eta gainerakoak, ondoren. Bestalde, kutsadura atmosferikoagatiko kalte nabarmenaren berehalako mehatxua eragin duen gertakaririk ere ez da izan.

Euskadi errausketa-baldintza zorrotzenetakoak eskatzen dituen Europako lurraldea da. Euskal Autonomia Erkidegoan 21 errausketa-labe daude guztira: Araban, 4; Bizkaian, 8 (horietako bi udalarenak) eta, Gipuzkoan, 9 (hiru, udalarenak). Urtean 9.300 errauste egiten dira Euskadin.

Ingurumeneko sailburu Ana Oregik eta sailburuorde Josean Galerak legebiltzar-batzordean gogorazi dutenez, instalazio mota horri airearen kalitateari eta atmosferaren babesari buruzko 34/2007 Legea aplikatzen zaio, eta 2011ko otsailaren 4an, ingurumen-organoak errauste-labearen funtzionamendurako baimena igorri zuen. Baimen horrek, bestalde, jardueraren baldintzak, isurtzeko muga-balioak eta instalazioan egin beharreko kontrolak biltzen zituen.

Eusko Jaurlaritzak joan den urtarrilaren 29an onarturiko ebazpenean eman zitzaion baimena FB SAri. Baimen horrek jarduera gauzatzeko hainbat baldintza ezartzen zituen; besteak beste: funtzionamendu-baldintzak betetzea, muga-balioak errespetatzea, isurketen eta airearen kalitatearen kontrolak egitea, eskakizun teknikoak izatea, atmosferara eginiko isurketen erregistro eguneratua izatea, eta, uneoro, jardueraren berri ematea administrazioari. Baimen berriak zortzi urteko iraunaldia du; horren ondoren, berritu egin beharko da, betiere, jardueraren baldintzak betetzen badira.

Ebazpenean adierazitako baldintzez gain, enpresak konpromisoa hartu du hainbat alderdi teknikori buruz; besteak beste, errausketarako gutxieneko tenperaturak beti monitorizatzea eta automatikoki erregistratzea, eta errausketak «gehiegizko oxigeno kopuruarekin egitea -% 6tik jaitsiko ez den batez besteko edukiarekin-, eta oxigeno-ekarpena etengabe erregistratzea, % 3tik beherako oxigeno-kontzentrazioetarako alarmarekin. Horretaz gain, ez da materialetan edo estalduran PECa, melamina, kloroa edo metal astunak dituzten hilkutxarik erraustuko (heldulekuak eta apaingarriak errausketa baino lehen kenduko dira)».

Ingurumen-sailburuak azaldu duenez, «funtzionamendu-baldintzek errausketa-prozesuan iritsi beharreko tenperaturari eta oxigeno-ehunekoari egiten diote erreferentzia, baita erraustu daitezkeen hilkutxen ezaugarriei ere».

«Funtzionamendu-baldintza horiek betetzen direla bermatzeko, jarduera baimenean adierazitakoez bestelako baldintzetan garatzea saihesten duten sistemak ezarri dira; esaterako, labearen tenperatura 850º-tik beherakoa denean labea kargatzea galarazten duen katigamendu bat; edo labeak oxigeno-ekarpena etengabe erregistratzea» erantsi du sailburuak.

Kontrola
Araudiak ezartzen duen bezala, atmosferara eginiko isurketen kontrolak instalazioaren titularrarekin inolako loturarik ez duten ingurumen-lankidetzako entitateek egingo dituzte. Entitate horiek, halaber, UNE-EN-ISO 17.020 ziurtagiria izango dute eta, jarduera gauzatzen ari diren bitartean, Ingurumen Sailburuordetzak argitaratutako jarraibide teknikoak beteko dituzte.

Eusko Jaurlaritzako Ingurumen Administrazioaren Zuzendaritzak Bilboko Gure Etxea bizilagunen elkarteari jakinarazi dio FB SA enpresak jarduerarentzat ezarritako baldintzak betetzen dituela, eta gogorarazi die baimena ontzat ematean ez direla aintzat hartu instalazio berrien eraikuntza edo dauden instalazioen aldaketa nabarmena.

Ingurumen Sailburuordetzak zehaztu duenez, instalazioak isurketa nahiko txikiak egiten ditu, lan egiten duen denbora (egunean 4-6 ordu) eta emaria (900-1.300 m3/h) mugatuak baitira. FB SA enpresak eginiko baimen-eskaeraren izapidetzean zehar, Sailburuordetzako teknikariak bitan izan ziren instalazioan hura ikuskatzeko.

Joerak
Ingurumen-organoak aintzat hartu du kontaminatzaileei buruzko Stockholmeko Ituna, eta han jasotakoak baino isurketa-muga zorrotzagoak ezarri ditu. Ondorioz, instalazioak sistema osagarri bat jarri behar izan du atmosferara eginiko isurketak arazteko.

Gaur egun, 21 errausketa-labe daude funtzionamenduan Euskal Autonomia Erkidegoan: Araban, 4; Bizkaian, 8 (horietako bi udalarenak) eta, Gipuzkoan, 9 (hiru, udalarenak). Urtean 9.300 errauste egiten dira. Errausketa-labe baten kostuak 150.000 euro inguru izaten dira, eta horri, arazketa-sistemaren 300.000 euro erantsi behar dizkiogu.

Espainian arazketa-sistema duen oso errausketa-labe gutxi dago, ez baitago instalazioak behartzen dituen araudirik. Frantzian errausketa-labe berri guztiak arazketa-sistema izatera behartu zituzten 2010ean, eta lehendik zeudenak 2018a baino lehen eguneratzera. Britainia Handian 2013rako errausketen % 50 araztuta egotea lortzeko plana dago. Alemaniako, Belgikako eta Norvegiako joera instalazio berriei arazketa eskatzea da. Euskadin, Eusko Jaurlaritzak baimenak emango dizkie arazketa-sistemak dituzten instalazio berriei. 2019ra arte, lehendik zeuden errausketa-labeek funtzionatzen jarraitzeko aukera izango dute, baina baldintza zorrotz batzuk jarraitu beharko dituzte; adibidez, urtean 800 errausketa baino gehiago ez egitea, eta, eginez gero, adierazitako arazketa-sistema instalatzea. 2019ko uztailaren 1etik, EAEko errausketa-labe guztiek arazketa-sistemekin funtzionatuko dute, urtean 200 errausketatik behera egiten dituzten karga txikikoek izan ezik; horiek ez dute arazketa-sistemarik beharko.

• Ingurumen eta Lurralde Politikako sailburuak trenbidearen lanak bisitatu ditu, Aiz sailburuordearekin eta Eibarko alkatearekin batera
• Amañako lurpeko estazio berriak egungo geralekua ordezkatuko du. Gainera, bide eta espazio publiko berriak ere eraikiko dituzte.
  
• «Gure trenbide-sarean inbertituko dugu, garraio iraunkorragoa bermatzeko. Amaña Eibarko gainerakorako irisgarriagoa izango da»

Euskal Trenbide Sareak Eibarko Amaña eta Ardantza auzoen arteko trenbidea aldatu du. Eusko Jaurlaritzako Ingurumen eta Lurralde Politikako sailburu Ana Oregik azaldu duenez, tarte hau banatzeko lehen pausoa izan da, eta estazio berria ere eraikiko dute. Oregi, Garraioko sailburu Antonio Aiz, Eibarko alkatea eta ETSko eta Euskotreneko zuzendariak eta teknikariak obretan izan dira gaur goizean lanen aurrerabidea ikusteko.

«Bilbo-Donostia trenbidearen Amaña eta Ardantza arteko tartea banatzeko eta estaltzeko lanak 2012ko udazkenean abiarazi zituzten. Pasealeku goratua ETSk eta Eibarko Udalak trenbidea hirian integratzeko sinatu duten lankidetza-hitzarmenaren parte da», adierazi du Oregik.

Ana Oregirekin batera, Eusko Jaurlaritzako Garraioko sailburu Antonio Aiz, Eibarko alkatea eta ETSko eta Euskotreneko zuzendariak egon dira obrak bisitatzen. Obra zibilak 12.623.577 euroko aurrekontua du (BEZ kanpo), eta 2015eko udaberrian amaitzea aurreikusi dute. Zenbait kontraturen lizitazioak esleitzeko daude, hain zuzen ere, instalazioena, energiarena, seinaleena eta ibilgailuen zirkulazioari eragiten ez dioten komunikazioena.

Lan hauen bidez, 650 metro luze den trenbidea banatuko dute, Amañan lurpeko estazioa eraikiko dute geralekua ordezteko, obrek hartzen duten eremua estaliko dute eta bide eta espazio publiko berriak eraikiko dituzte.

«Lan hauei esker, 8.500 metro koadroko eremu goratua sortuko dugu, eta inguruaren itxura erabat aldatuko dugu. Hala, Amaña auzoaren irisgarritasuna hobetuko eta sustatuko dugu. Gure trenbide-sarean inbertituko dugu, garraio iraunkorragoa bermatzeko. Orain arte, lanen laurden bat bete dugu, gutxi gorabehera, horien artean eginkizun zailenetako batzuk», esan du sailburuak.

Trenek banatutako tarte berriaren lehen trenbidetik zirkulatzea lanen lorpen garrantzitsuenetako bat da. Egun hauetan, trenbide zaharra desmuntatzen, egitura osatzen, estaltze-lanak hasten, Amaña auzoko sarbide berriak eraikitzen eta Arrateko biaduktua eraisten ari dira.

Obren arduradunek Oregiri azaldu diotenez, egitura berriaren zimenduak jartzeko eta hormak eraikitzeko lan gehienak amaituta daude eta eraisketa-lan zailenetako batzuk egin dituzte jada. Adibidez, egiturak eraisteko tonaje handiko garabiak erabili behar izan dituzte, eta hormigoia eta altzairua mozteko, zerra bereziak. Bestalde, lan gehienak gauez egin dituzte; beraz, ez dute trenen zirkulazioa eten, joan den asteburuan izan ezik, aldi bateko mozketa izan baitzen.

Obrak Eibarko hirigunean daude, eta hori da ezaugarrietako bat. Lan guztiei eragiten die, eginkizun, mugimendu edo aldaketa guztiek kudeaketa ugari ekartzen baitituzte, kalteak saiheste aldera. Horregatik, eraikuntza-lanak, trenen zirkulazioa eta herritarren egunerokoa bateratzeko, obra zazpi fasetan banatu da.

Erdigunea
Eusko Jaurlaritzako Ingurumen eta Lurralde Politika Sailak askotariko lanak egin ditu Bilbo eta Donostia arteko trenbidean azken urteetan, eta horietara 41,3 milioi euro bideratu dituzte. Adibidez, Ermuako Izelaietako trenbide-pasagunea desagerraraztea, Eibarko San Lorentzo eta Unibertsiatearen arteko tartea banatzea, Ardantzako estazioa eraikitzea, estazio zaharra birgaitzea, Txarakuako pasabidea kentzea, Txarakua eta Azitain arteko tartea banatzea eta Elgoibarko Karakateko gurutzaketaren lanak.

Gainera, Ermuan trenbideak banatzeko eta estazio berri bat eraikitzeko lanak aurreikusita daude, eta Ardantza-Eibar zatia banatzeko eta Ardatza-Azitain tartea estaltzeko proiektuak aztertzen ari dira.

Konplexutasuna
«Ermua-Eibar-Elgoibar ardatzean gauzatutako lanak oso zailak izan dira inguruaren ezaugarriak direla-eta. Trenbidea mendiaren eta trenbidearen ondoan altxatutako eraikinen artean sartuta dago. Mendi-hegalari eusteko denbora, lan, esfortzu eta diru-kantitate handiak behar dira, eta horrek ezin dio tren-zirkulazioari eragin», nabarmendu du Garraioko sailburu Antonio Aizek.

Eusko Jaurlaritzako Ingurumen eta Lurralde Politika Sailaren esku dagoen Euskotren Sozietate Publikoak, gaur asteazkenetik 17:00etatik aurrera, bihar osteguneko goizeko 11:00ak bitartean, Zumaia eta Zarautz artean autobusen ibilbidea aldatuko du, ekaitzagatik laranja alerta dela eta.

Gaur asteazkenetik 17:00etatik aurrera eta bihar osteguneko goizeko 11:00ak arte, Zumaia – Donostia (errepide nagusitik) eta Zumaia – Donostia (autobidetik) lineako autobusak Megaseko errepidetik ibiliko dira Zumaia eta Zarautz artean.

Hori dela eta, 17:00etatik aurrera, era berean Getaria eta Meagaseko Gainaren artean lotura zerbitzua ezarriko da.

Informazio gehiago behar duten erabiltzaileek 902 543 210 informazio telefonoa eta www.euskotren.es Euskotreneko web-orrialdea eskura izango dituzte.

URAk aurten lizitatuko du Faduraren hobetze hidraulikorako proiektua.

• IV. Fasearen proiektua 2015eko lehen hiruhilabetekotik aurrera egingo da, Uribe kosta zubitik Salsidura doan tartean.

• Lanek hamabi hilabete iraungo dute lizitatzen denetik aurrera, eta 4,1 miloi eurotako aurrekontua izango dute

Uraren Euskal Agentziak, Eusko Jaurlaritzari atxikirik dagoen erakundea, Getxo-Gobelako Batzorde Informatiboan informatu du prest duela Fadurako eremuaren hobekuntza hidraulikorako behin betiko proiektua.

Iñigo Ansolak, URAko zuzendari nagusiak, adierazi duenez "Proiektuaren izapidetze administratiboa - "Getxon Gobela ibaiaren egokitze hidrauliko eta ingurumena hobetzeko" proiektuaren 4 Fasea izango dena - 2014. urtean zehar egingo da. Izapidetze horrek barne hartzen ditu informazio publikorako epea, ingurumen izapideak eta behin betiko onarpena. Horren bestez, proiektuaren lizitazioa 2014ko azken hiruhilabetekoan egin ahal izango da, eta obrak 2015ko lehenengo hiruhilabetekorako hasi litezke.

Ansolaren hitzetan, "Lanek 12 hilabeteko iraupena izango dute, eta, horretarako, 4,1 miloi eurotako inbertsioa egingo dugu".

Proiektuan zehazten diren lan hauek Uribe Kosta zubitik eta ,uretan gora, Salsidun jada eginak diren lanen hasieraraino doan tartean egingo dira. Beraz, Gobelako ibilguan 775 metrotan zehar egingo diren lanak, arro osoan ur hustuketa handituko dutenak.

Batzordeari azaldu zaion legez, lan hauen xedea da , Faduran Gobela ibaiaren aldameneko eremuak hustea, ur hazkundeari lekua emango dion albo-plataforma bat sortzeko. Hau da, ur handiko sasoietarako ibaiaren ur hustuketarako ahalmena handitzen dugu Faduran, urak tokia izan dezan ur goraldiek kalterik sortuko ez duten eremuetan zabaltzeko. Horretarako, Fadurako zubi eta pasabideak eraitsi eta ordezkatu beharko dira.

Errekaganeko lanei dagokionez, URAK azaldu du:

• Gobela ibaiaren ibilgu berria egiteko pantailak bukatu berri dituela URAK Cristobal Valdéseko gainezkabidetik eta Gobelako Metro geltokira doan zubiaren arteko eremuan. Behin lan hauek bukatuta, hurrengo hilabeteetan URAk ekingo diola ezkerraldeko ibai ertzeko oinezkoentzako ibilbidearen urbanizazioari, Erromoko Polikiroldegiaren aurrean kokatzen dena.

• Gobela Ibaiko egokitze hidrauliko eta ingurumena berreskuratzeko 1. Faseko (Errekagane tartean, Cristobal Valdés-eko gainezkabidetik La Avanzada-rainokoa) lanak bat egiteni dutela hasierako aurreikuspenekin, eta, beraz, ezustekorik egon ezean, lanak udazken aldera bukatuko direla.

• Ibilbidea birjartzeaz gain, ibilgu berria egiteko pantailak jartzeari ekingo zaio Gobelako Metro geltokira doan zubitik eta Villa Plentzia arteko eremuan. Horretarako lanetan erabiltzen ari den makinaria astuna bertara eramango da.

Azkenik, galdera eta iradokizunak egiterako orduan, Batzordeko kide batzuek haien egoneza adierazi zuten: Fadurako obren berri emateko prentsa agerraldi bat egiteagatik, batzordea deitu aurretik. Honen harian, Alkateak kritika horiek entzun egiten dituela esan zuen. Halere adierazi zuen prentsa agerraldiarekin lanak aurrera egiteko aurrekontu konpormisoaren berri eman nahi zuela, eta proiektuaren xehetasun teknikoak batzordean egitea aldez aurretik aurreikusi zuela.

Euskotrenek tren zerbitzua indartuko du igandean, otsailaren 9an, Erreala eta Levante U.D. taldeek Anoeta estadioan 19:00etan jokatuko duten partida dela eta.

Zerbitzua indartzen duten tren bereziek ohiko geldialdiak egingo dituzte gainerako geltokietan. Tren zerbitzuak (ohiko trenak eta bereziak) honako ezaugarri hauek izango ditu:

NORGEHIAGOKAREN AURRETIK

• Hendaiatik - ANOETA- Lasarte: 18:03an

• Errenteriatik - ANOETA: 18:08an

• Oiartzundik – ANOETA: 18:12an

• Irunetik - ANOETA: 18:18an

• Herreratik – ANOETA: 18:45ean

• Donostiatik - ANOETA : 18:30ean,

• Lasartetik – ANOETA – Hendaia: 18:30ean

NORGEHIAGOKAREN ONDOREN

•ANOETA - Hendaia:  21:03an,21:18an, 21:21ean (Errenteria) eta 21:33an

•ANOETA– Lasarte: 21:07an eta 21:37an.

Gainerako trenek bere ohiko ordutegia mantenduko dute.

Informazio gehiago behar duten erabiltzaileek Euskotrenen honako telefono zenbaki honetara dei dezakete 902 543 210. Horrez gain informazioa jaso dezakete geltokietan eta geralekuetan eta konpainiaren web gunean www.euskotren.es

• Eusko Jaurlaritzak 1.300 milioi euro inbertitu ditu hamaika urtean

Euskal trenbide-sare propioa edo Euskotrenek emandako zerbitzua mugikortasun jasangarriaren oinarrietako bat da Eusko Jaurlaritzako Ingurumen eta Lurralde Politikako sailburu Ana Oregiren iritziz, eta 1.300 milioi euro inbertitu dira bertan azken hamaika urteetan. Euskal Autonomia Erkidegoko garraioen eta logistikaren arduradun nagusiak honela azaldu du hori legebiltzarrean egindako agerraldian: «euskal trenbide-sare propioa gure lehentasunetako bat da garraio jasangarri, arin eta erakargarri bat lortzeko, eta lehentasunezko arreta eskaintzen diogu plangintzari, kudeaketari eta mantentzeari dagokionez».

Oregik adierazi duenez, «Jaurlaritza gogotik lan egiten ari da abiadura handiko trenbide-azpiegitura bat garatzeko; autonomia-erkidegoko hiru hiriburuak Irun eta Bordelerekin lotuko ditu horrek, bai eta penintsulako erdialdearekin ere, Ardatz Atlantikoa deitutakoaren barruan. Baina egunez egun beste trenbide-sare batzuk ere kudeatzen, lantzen eta garatzen ditugu gure herrialdean mugikortasun jasangarria ahalbidetzeko; hala, herritarrek egunero erabiltzen dituzten sare horiek Euskotreneko tranbia, metro eta trenetan egindako hiri barneko zein hiriarteko joan-etorrietan».

«2001 eta 2012 urteen artean, gure trenetan eta tranbiatan 1.298.720.347 euro inbertitu dira orotara. % 9 Araban, tranbia baizik ez dugunez; % 40 Gipuzkoan, eta % 51 Bizkaian», zehaztu du sailburuak.

2001 urtean, 52.522.971 euroko inbertsioak egin ziren. 2006an, 62 milioi inbertitu ziren. Urtebete geroago, 77 milioi. 2008an, 125. 2009an, 146. 2010ean, 186 milioiko inbertsioa egin zen, 277koa 2011n eta 158 milioi eurokoa 2012 urtean. Zenbateko horiek ez dituzte barne hartzen Gobernuak kudeatutako beste trenbide batzuk, Bilboko metroaren 1. eta 2. lineak, kasu, ezta euskal trenbide-sare berria ere, Sustapen Ministerioaren menpe dagoenez.

«Orotara, azken hamabi urteotan 1.110 milioi euroko inbertsioa egin dugu trenetan eta 188koa tranbiatan. Azpiegiturak hobetzera 238 milioi euro bideratu ditugu», azaldu du Oregik. «Eusko Jaurlaritzak kudeatzen duen trenbide-sare propioak egunean milaka euskal herritar garraiatzen ditu. Araban, hiriburuko tranbia besterik ez dago gure esku, baina Ministerioak Manzanos, Langraiz eta Gasteiz arteko Renferen aldirietako zerbitzuei eustea lortu dugu».

Ingurumen eta Lurralde Politikako sailburuak nabarmendu duenez, Eusko Jaurlaritza «txartel bakarra lortzeko lanean ari da; jada abian da Ermua eta Elgoibar artean, eta heldu den urtean Bilboko eta Gasteizko tranbietara zabalduko da, bai eta, hala espero dugu, Baiona/Donostia zerbitzuetara ere. Akitania-Euskadi Euroeskualdeko mugikortasunari buruzko lan-bileretan lantzen dute gaia, non Euskotreneko zerbitzuek, eta Donostialdea metroaren/Topoaren zerbitzuek, Hendaiako geltokian, Baionara arteko TER/SNFC zerbitzuekin duten lotura hobetzeko lanean ari diren».

«Hendaiako lotura akasgabea izan behar da: ordutegiak bat etorri behar dira noranzko bateko zein besteko Donostiako Metroaren eta TER zerbitzuaren erabiltzaileei konexioa errazteko, eta, aldi berean, joan-etorri horiek areagotuta, autoaren erabilera murrizteko», zehaztu du Oregik, eta hauxe nabarmendu du ondoren: «euskal trenbide-sare propioa gure lehentasunetako bat da garraio jasangarria, arina eta erakargarria lortzeko. Horregatik, lehentasunezko arreta eskaintzen diogu plangintzari, kudeaketari eta mantentzeari dagokionez».

• Almudena Ruiz de Angulo: «Energia-kontsumoari dagokionez eraikin jasangarria eta eraginkorra izango da, eta bere jardunak sortzen dituen hondakinak kudeatzeko prestatuta egongo da»

•«Urte osoan egunero erabiltzeko moduko esparru bizia izango da, ez bakarrik arrantzaren araberako sasoi eta ordutegiari lotua»

Iaz hasitako lizitazio-prozesuaren ondoren, Eusko Jaurlaritzako Ingurumen eta Lurralde Politikako sailak «I.A. eta Bazkideak Arkitektura Taldea» arkitektura-estudioari esleitu dio Ondarroako lonja berriaren proiektua idazteko kontratua, 235.600 €-tan gehi BEZA, eta enpresak hamar asteko epea izango du herriko arrantzale, saregin, neskatila, handizkako tratulari, eta armadoreek, arraina behar bezala, kondizio higieniko ezin hobeak bermatuta, manipulatzeko eta hark baliorik ez gal ez zezan, aspalditik premiaz eskatzen zuten esparrua eskura ipintzeko bidean.

Eusko Jaurlaritzako Azpiegituren zuzendari Almudena Ruiz de Angulok azaldu duenez, «idatzi beharreko proiektuak arraina moilara iritsi orduko haren lehen manipulazioa egiteko espazio ergonomiko eta funtzional batez hornitu behar du Euskal Autonomia Erkidegoko arrantza-portu nagusia, hartara produktuaren eskakizun higieniko-sanitarioak betetzeko eta balioari euts dakion. Horrez gain, definitu beharrek espazioak hiri-eremuan harmonikoki integratu beharko du, Portuko Plan Bereziaren xedapenak zein Udalaren eskakizunak errespetatuta».

Ruiz de Angulok gehitu du Ondarroako lonjak «eraikin jasangarria eta energia-kontsumoari dagokionez eraginkorra izan beharko duela, eta jardunak sortzen dituen hondakinak kudeatzeko prestatua, hartara portuko eta inguruko uraren kalitatea hobetzeko aukera emanik. Azkenik, herrian aparkatzeko dagoen beharra antolatu eta hari irtenbide bat ematen saiatu beharko du».

«Lonja berriaren proiektua -azpimarratu du azpiegituren zuzendariak- aukera aparta da portu-ingurua herriarekin integratzeko eta arrantzaz harago doazen beste erabilera zabal eta handi-nahikoago batzuk ere izateko. Lonja berriaren eraikuntzaz baliatuko gara erabilera ugariko espazio bat sortzeko, non herritarrek portuko eta itsas aurreko paisaiaz eta hango jarduerez gozatu ahal izango duten».

Jasangarria
Horretarako, kontratua esleitu zaion eskaintzak «bere barruan arrain-lonja izango duen 8.500 metro karratu inguruko paseatzeko moduko plataforma urbanoa sortuko duen eraikin-multzo bat» definitu du. «Pasaiako lonja berriaren kasuan bezala, plaza publiko berria irabaziko du Ondarroako herriak, Itsas Aurreren luzapen gisa, eta horrek konpentsatu egingo du, nolabait, espazio publikoaren eskasia, eta optimizatu, berriz, udalerrian diren espazio libre apurrak», nabarmendu Almudena Ruiz de Angulok.

Euskal Autonomia Erkidegoko arrantza-portuen arduradunak jo du proiektua idazteko «eraikin hibrido bat proposatzen dela, non arrantza-jarduera erdi-ezkutatuta geratuko baita plataforma urbano zabal baten pean. Handik gorantz aterako diren bi eraikin singularretan egongo dira erabilera urbano eta administratiboak. Eraikin horietan egongo dira, hain zuzen, kafetegia eta jatetxea eta erabilera askoko espazio librea, non erabilera posible ugari koka litezke, hala nola ludikoak, kulturalak eta merkataritzakoak, udalarekin eta herriko eragileekin definitzen den bezala. Erabilera askoko modu hori halako moduan egongo da eginda, non behar izanez gero, handizkako tratularientzako moduluak handitu ahal izango bailirateke. Administrazio-dorrerako herritarrentzako sarbidea ere maila horretan egongo da; profesionalen sarbidea, berriz, behe-solairutik egingo da.»

«Ondarroako lonjaren eraikina urte osoan egunero erabiltzeko moduko esparru bizia izango da, ez bakarrik arrantzaren araberako sasoi eta ordutegiari lotua. Alegia, nahiz eta lonja une batean lanean aritu ez, eraikina, plataforma urbano handi bihurtuta, bere eginkizuna egiten jarraituko du, bestelako jarduerak eta hiriaren eta portuaren arteko benetako fusioa ere eragiten», adierazi du Eusko Jaurlaritzako Azpiegituretako zuzendariak.

Barne-funtzionamenduari dagokionez, berriz, arrantza-jarduerak eta gainerako jarduerek eragiten duten zirkulazioaren arteko interferentziarik ez da gertatuko. Hori horrela izateko, arrainarekin lotutako prozedura guztiak, hasi portura iristen denetik eta kamioia irten arte, horizontalki egingo dira, deskargako moilaren maila berean, eta transferentzia bizkorra eta zuzenekoa izango da.

Nortasuna
«Asmoa da -esan du Ruiz de Angulok- ikusizko inpaktua ahalik eta txikiena izatea, eta horretarako plataforma berria zurezko zabalgune handi moduan planteatu da, moilen irudiarekin bat egiten duen harrizko oinarri baten gainean egina. Plataforma haren gainean azalduko dira, lurpetik, handizkarien moduluen pabilioia eta administrazio-dorrea, irudi industrialago batekin, horma zeharrargiekin eta. Horiei esker arintasuna izango dute bolumen biek eta ondorio bisual txikiagoa eragingo diote herriaren ikuspegiaren soslaiari. Etxaurreak horrela tratatzeak aukera ematen du, halaber, bi bolumen gorakor horiek gauez argiztatuta ikusteko, portuko itsas-argi baten moduan, Donostiako Kursaalaren kasuan bezala».

Eusko Jaurlaritzaren arduradunek lonjaren eta herritarren artean partekatutako aparkaleku bat dute buruan, zeinek bere sarbide propioa duela. Sarrera nagusia portuko sarrera murriztuko eremuan legoke; herritarrena, aldiz, kanpoan. Espazioa banatu ere egin liteke, eta aise birdimentsionatu, gortina mugikorrez nahiz bestelako irtenbide batez, erabilera-beharren arabera.

Kontratua esleitu zaion lehiakidearen programak lehiaketako oinarrietan, Plan Berezian xedatutakoa eta erredaktoreek Ondarroako portuan, eragileei egindako kontsultetan bildutako informazioa garatu du. Espazio garden gisa diseinatuko da arrain-lonja berria, arraina banatuko duen ardatz antolatzaile moduan; ezer baino lehen funtzionala, manipulazioa, lehorreratzea, sailkatzea, salmenta, banaketa eta irteera ahalik eta bizkorren egiteko. «Konplexuaren erdian gune zabal bat izango da, gardena eta balio ugarikoa, eta moilarantz irteera zabalak izango ditu. Banatzeko kamioiak kargatzeko sarrera egokia izan beharko du, eta baskula, jela-ontziak, kutxak eta, estrategikoki antolatuta egongo dira», azpimarratu du Ruiz de Angulo zuzendariak.

«Proiektuaren ezinbesteko baldintza zen aretoak klimatizazio ezin hobea izatea, lur hoztailez hornituta eta bolumenak sektorizatuta. Altuera aldatzeko moduko eremuak izango dira, malguak, alegia. Armadoreen eta handizkarien erabilerak eta mugimenduak bereizi eta banandu egingo dira. Beraz, eraikin jasangarria izan beharko du, bai ustiapen-fasean, bai eraikuntza-fasean», gehitu du Ruiz de Angulok.

Elkarlana
Proiektuaren garapen funtzionala arraina lehorreratzeko, erakusteko eta saltzeko behar den espazio-beharraren arabera gauzatuko da. Arrain-bolumena, jakina, ez da beti bera izaten, eta urte-sasoiarekin eta, inoiz, egunarekin ere aldatzen da. «Lan handia dago oraindik egiteko elementu horiek guztiak planoetan eta dokumentuetan egoki islatzeko eta eraikin singular hau eraikitzeko», adierazi du Ruiz de Angulok.

Horiek guztiak behar bezala definitzeko, Eusko Jaurlaritzako Azpiegituretako zuzendaritzak lan-mahai bat egiteko deia egingo die Udalari eta arrantzan eta arrainaren manipulazioan, estiban eta deskargan diharduten eragileei. Lan horietan hartuko dute parte Eusko Jaurlaritzako Arrantzako zuzendaritzak eta Hazi eta Azti-Tecnalia enpresek ere.

• Eusko Jaurlaritzak tona kopuru handiko 200 harri-bloke eta 35 hormigoi-bloke ipini ditu
• Lanek asteburuan jarraituko dute
• Adituen txostenak eta berrikuspenak olatuek eragindako Gipuzkoa eta Bizkaiko portuetan

Eusko Jaurlaritzako Ingurumen eta Lurralde Politika Sailak harri-bloke handiak ipintzen jarraituko du asteburu honetan Bermeoko portuko defentsan; olatuek Frantxua eta Portuzaharra aldeetan kalte gehiago egitea saihestuko dute horiek behin-behineko. Egunotako denboraleek kaltetutako Gipuzkoako eta Bizkaiko portu-elementuak aztertzen, ebaluatzen eta berreraikitzen jarraitzen du Azpiegituren zuzendaritzak, halaber.

Kostaldean beste denborale bat iragarri dute astebururako, eta Eusko Jaurlaritzak portuetan kontu-neurriak hartzeko eskatu du berriro. Ingurumen eta Lurralde Politika Saila babes-elementuak jartzen aritu da hilaren 2tik aurrera Frantxuako zabalgunean; hala, 22 tona arteko harri-bloke handiak ipini dituzte olatuen eragina arintzeko. Honela azaldu du Eusko Jaurlaritzako Portuen zerbitzuburu Natxo López de Aguiletak:

• MP3 AUDIOA AGUILETA BERMEO ASTEBURUA

Bermeoko Portuzarreko hormaren haustura behin-behineko estali da Bilboko portutik eramandako 35 hormigoi-blokez; horien bitartez, asmoa da «sartzen ziren eta kirol-portua kaltetzen zuten olatuen energia ezeztatzea». Bloke horiek eta Frantxuako granitozko kuboak kaltetutako azpiegiturak behin betiko berreraikitzeko lanetan erabiliko dira.

«Hasieratik bertatik Bermeon, kaltetuena baita, zein gainerako euskal portuetan olatuen indarrak kalte ditzakeen bizitzak eta ondasunak babesteko lanean ari gara», zehaztu du Eusko Jaurlaritzako Azpiegituren zuzendari Almudena Ruiz de Angulok; horretaz gain, «portu, hainbat udal eta erakunde, enpresa eta larrialdi-zerbitzuetako langileen laguntza eta babesa» eskertu ditu berriro, «denboraleen eragina ahal den neurrian arintzen ari baitira».

Euskotrenek tren zerbitzua indartuko du asteazkenean, otsailaren 12an, Erreala eta F.C.Barcelona. taldeek Anoeta estadioan 22:00etan jokatuko duten partida dela eta.

Zerbitzua indartzen duten tren bereziek ohiko geldialdiak egingo dituzte gainerako geltokietan. Tren zerbitzuak (ohiko trenak eta bereziak) honako ezaugarri hauek izango ditu:

NORGEHIAGOKAREN AURRETIK

• Hendaiatik - ANOETA- Lasarte: 21:03an

• Irunetik – ANOETA: 20:52 an, 21.07an eta 21:22 an

• Oiartzunetik  – ANOETA: 21.04an, 21.20an, 21:27an eta 21.34an

• Errenteriatik – ANOETA: 21.08an, 21:16an, 21.23an, 21.31an eta 21.38an

• Lasartetik – ANOETA – Hendaia: 21:30ean

• Zumaiatik – Donostia: 20:30ean eta 21:00etan. Amarako geltokira heltzean erabiltzaileek Anoetara doan tren bat hartu beharko dute.

NORGEHIAGOKAREN ONDOREN

Norgehiagokaren ondoren, luzapenik ez badago

•ANOETA - Hendaia:  23:55ean, 0:03an, 0:08an eta 0:18 an

•ANOETA – Lasarte: 0:07an

•ANOETA– Zumaia: 00:10ean

Norgehiagokaren ondoren, luzapena badago

Partidua luzapena eta/edo penaltien ondoren bukatzen bada, lehenengo zerbitzua (Hendaia noranzkoa) Anoetatik partidua bukatu eta 5 minutu geroago irtengo da eta ondorengo segidari eutsiko dio:

- 1. Hendaiara doan trena

- 2. Hendaiara doan trena lehenengoa irten eta 8 minutura

- 3. Lasartera doan trena lehenengoa irten eta 12 minutura

- 4. Hendaiara doan trena lehenengoa irten eta 14 minutura

- 5. Zumaiara doan trena lehenengoa irten eta 15 minutura

- 6. Hendaiara doan trena lehenengoa irten eta 23 minutura

Gainerako trenek bere ohiko ordutegia mantenduko dute.

Informazio gehiago behar duten erabiltzaileek Euskotrenen honako telefono zenbaki honetara dei dezakete 902 543 210. Horrez gain informazioa jaso dezakete geltokietan eta geralekuetan eta konpainiaren web gunean www.euskotren.es

• Ingurumen eta Lurralde Politika Sailak eztabaida-foroak eta lan tailerrak sustatuko ditu
• Josean Galera: «Datuak, askotan, unibertsitatean, ikerketa-zentroetan, aholkularitza-enpresetan, natur elkarteetan eta herri-administrazioan sakabanatuta daude, eta partekatu egin behar dira»

Eusko Jaurlaritzako Ingurumen eta Lurralde Politika Saila biodibertsitatearekin lotutako herri-plataforma zientifiko bat sortzea bultzatzen ari da, akademia, ikerketa, gizarte, enpresa eta administrazio arloetako eragile guztiek sortutako informazioa bateratzeko, eta hala, «biodibertsitatearen zaintza eta erabilpen jasangarriari buruzko ezagutzaren oinarria funtsezko moduan indartzeko».
Josean Galera Ingurumen sailburuordeak honela azaldu du: «Gizarteak espezieen presentziari eta fenologiari buruzko informazioa biltzen eta argitaratzen partaidetza aktiboa izatea sustatzen dugu, biodibertsitatearen zaintzari eta erabilpen jasangarriari buruzko ezagutzaren oinarria funtsezko moduan indartzeko».
«Biodibertsitateari buruzko informazioa konplexua da -gaineratu du Galerak-. Ezagutza zientifikoaren oinarria handia da, oso espezializatua eta askotariko eragileek sortzen dute: unibertsitateak, ikerketa-zentroek, aholkularitza-enpresek, natur elkarteek eta herri-administrazioak. Ondorioz, askotan, datuak eta informazio-baliabideak sakabanatuta daude, askotariko tratamenduak ematen zaizkie, informazioa eskuratzeko baldintzak ere askotarikoak dira eta informazioa modu bateratuan biltzearen eta interpretatzearen falta igartzen da. Horrek, era berean, datuen lorpenean bikoiztasunak sortzen ditu eta sortutako informazio guztia ez ezagutzea».
Sailburuordeak zera gaineratu du: «Biodibertsitatearen inguruko azterketa-proiektu askotan, bertatik bertarako behaketak lanari lotutako boluntarioek egiten dituzte. Herri-ekimen zientifiko horiek kalitatezko datu eguneratuak jasotzeko, eta era berean, herritarrak biodibertsitatea zaintzeko jardueretan parte hartzera bultzatzeko bitarteko baliotsuak dira».
Ekarpenak
Josean Galeraren arabera, «boluntarioen ekarpenari esker, eskala handiko lanak egin daitezke; horretarako profesionalak lortzea, berriz, zaila izango litzateke». «Boluntarioen balioa, lanak izan dezaken eragin-eremuan edo neurrian ez ezik, ia inoiz kuantifikatzen ez den auzi batean datza: boluntario horiek egindako lanari ematen dioten balio ekonomikoan. Gainera, lan horrek dibulgazio eta gizarte-sentsibilizazio arloko funtzio garrantzitsua betetzen du».
2014an, Ingurumen Sailak 0. fasea aurrera eramango du: gaur egungo egoeraren diagnostikoa egingo du, beharrak aztertuz, hala nola etorkizuneko jardueren eragin-eremua eta finantzazio-aukerak definituz.
Parte hartzeko, pertsona interesdunek proiektua ezagutu dezakete eta partaideen zerrendan sartu, galdetegia beteta eta foroan parte hartuz. Maiatzean, Eusko Jaurlaritzaren Gasteizko egoitzan, horri buruzko tailer-foro bat egingo da.
INFO +: http://www.ingurumena.ejgv.euskadi.net/r49-u95/eu/contenidos/noticia/onspire/eu_bio/documento.html

2014ko Hondakinak Prebenitzeko Europako Astea

• Sari-banaketan, beren jardunbide egokiak direla-eta Europa mailako saria irabazteko hautagai izango diren Euskadiko lau erakunde eta enpresa ere aintzatetsi dira

Bilbo, 2014ko otsailaren 12a. Arrasate Institutuko (Arrasate), Aita Larramendi Ikastolako (Andoain) eta Easo Politeknikoko (Donostia) bederatzi ikaslek «Zure janaria ez da hondakina» izeneko lehenengo bideo-lehiaketako sariak irabazi dituzte -9 iPad mini-, batxilergoko, DBHko eta lanbide-heziketako kategorietan, hurrenez hurren. Euskal Autonomia Erkidegoko Hiri Hondakinen Koordinazio Organoak (HHKO) antolatu du lehiaketa, Hondakinak Prebenitzeko Europako Astearen esparruan.

Gaur eman dituzte sariak, Bilbon, HHKO osatzen duten erakundeetako hainbat ordezkarik; hain zuzen ere, Eusko Jaurlaritzako Ingurumen Administrazioko zuzendari Alejandra Iturriozek, Xabier Agirre´k, Ihobeko zuzendari, Arabako Foru Aldundiko Ingurumeneko zuzendari Belen Etxeberriak, Bizkaiko Foru Aldundiko Ingurumen Azpiegituretako zuzendari Marta Barcok eta Gipuzkoako Foru Aldundiko Ingurumen eta Obra Hidraulikoetako zuzendari Ainhoa Iraolak.

«Zure janaria ez da hondakina» izeneko lehenengo bideo-lehiaketarako deialdia Euskal Autonomia Erkidegoko 12 urtetik 18ra bitarteko ikasle guztiei zuzenduta egin da, 2013ko azaroaren 16tik 24ra bitartean izan zen Hondakinak Prebenitzeko Europako Astearekin lotuta. Lehiaketaren helburua hauxe zen: herritarrak, batez ere gazteak, elikagaiak arduraz kontsumitu beharraz eta kontsumitu gabeko hondakinen ondorioz sortzen den hondakin kopuru handia murrizteko beharraz jabearaztea.

Sare sozialetan -adibidez, Facebook eta Youtube- boto gehien jaso dituzten bideoei herritarren sariak Oñatiko Zuazola Larrañaga ikastetxearentzat eta Andoaingo Aita Larramendi ikastolarentzat izan dira. Bi ikastetxe horietako ikasle irabazleek Euskadiko Biodibertsitate Zentroak zetazeoak ikusteko eta entzuteko antolatutako itsas txango bat egin ahal izango dute.

Erakunde eta enpresentzako diplomen banaketa

Bideo-lehiaketa irabazi duten ikastetxeei saria emateko ekitaldian, Hondakinak Prebenitzeko Europako Asteko nazioarteko lehiaketan beren jardunbide egokiak direla-eta parte hartzeko aukeratu diren erakundeak ere aintzatetsi ditu HHKOk, diploma baten bidez. Uribe-Kosta Mankomunitatea, Mungia BHI, Goierri-Urola Garaiko Erakunde Sanitario Integratua (ESI) eta SEUR enpresa, hain zuzen.

Lau erakunde horiek Euskadin egin zen Hondakinak Prebenitzeko Europako Astean parte hartu zuten, eta Euskal Autonomia Erkidegoan Europako sarietarako hautagai izateko hautatu dituzte, beren proposamenak aurkeztu zituzten 60 entitateen artean. Aipatutako lehiaketan, Europako herrialdeetako hainbat erakunderekin lehiatuko dira. Europako saria maiatzaren 22an, Erroman, ematekoak dira.

Uribe-Kosta Mankomunitatearen kasuan, bere proposamena Barrika, Berango, Gorliz, Lemoiz, Plentzia, Sopela eta Urdulizko ikasleen artean askarirako ontzi berrerabilgarri eta garbigarriak banatzea izan da. Horrela, ohiko bilgarrien bidez sortzen diren hondakinak murrizteko asmoa zegoen.

Mungia BHIren proiektua pilak eta bateriak arduraz jasotzeko da, ikasleak eta beraien senideak mota horretako hondakinak birziklatzearen garrantziaz jabearazteko asmoarekin. Ikastetxeko hainbat zikloren arteko lehiaketa baten bidez osatu dute.

Bestetik, Goierri-Urola Garaiko Erakunde Sanitario Integratuak (ESI) material ortopedikoa berrerabiltzea proposatu du. Horretarako, material hori daukaten eta dagoeneko behar ez duten pertsonek behar dutenei dohaintzan emateko sare bat eratzea aurreikusi du. Gurpil-aulkiak, ohe artikulatuak edo makuluak berrerabiltzea sustatzeaz gain, material hori dagoeneko behar ez dutenei arazo bat konpontzen die, etxean traba egiten baitie.

Azkenik, SEUR enpresak kontsumo maila eta hondakin kopurua murrizteko beharraz jabearazteko bi komunikazio-kanpaina aurkeztu ditu. Zehazki, «Bizitzarako bizikletak» kanpainaren bidez, ezintasunen bat daukaten pertsonei lana ematen dieten tailerretan bizikletak konpontzeko zerbitzu bat sustatzen du, eta era berean, gizarte-kolektibo ahulei bizikletak doan ematea. Horrekin batera, «Bizitza berri baterako tapoiak» kanpainaren bidez, SEUR-eko bulego-sarea tapoiak biltzeko eta garraiatzeko erabiltzea eskaintzen du, eta salmentaren bidez lortutako funtsak osasun-arazoak dauzkaten baliabide ekonomiko urriko haurrei ematen dizkie.

Informazio gehiago:
HHKOko Idazkaritza Teknikoa Ihobe, Eusko Jaurlaritzaren Ingurumen Kudeaketarako Sozietate Publikoa

• Ingurumen eta Lurralde Politiketako sailburuak sare berriak Euskal Autonomia Erkidegoari ekarriko dizkion onurak azaldu ditu, xehe, Legebiltzarrean
•«Lurralde-kohesioa hobetuko du eta garapen jasangarriari eta aurrerapen ekonomikoari eta kulturalari mesede egingo die»

Eusko Jaurlaritzako Ingurumen eta Lurralde Politikako sailburu Ana Oregiren ustez, «Euskal Y zerbitzua ematen hasten denean -alegia, aurki- Euskadik trenbidez isolatuta egoteari utziko dio eta Europako proiektu lehenetsi nagusietako bati bilduko zaio, lurralde-kohesioa nabarmen hobetuta eta garapen jasangarriari eta aurrerapen ekonomikoari eta kulturalari mesede eginda».

Eusko Legebiltzarrean egin duen hitzaldian, Oregik gogora ekarri du Sustapen ministerioa eta ADIF Burgosen eta Gasteizen arteko zati guztietako proiektuak egiten ari direla. «Erakundearteko Batzordeak eginiko bilkuran -dio sailburuak- Ministerioak, Azpiegituretako Idazkariaren ahotik, adierazi zuen "bidezati hori abiadura handiko bide berri batez eraikitzeko asmoa duela". Eraikuntza horrek Euskal Y zerbitzuan hasteak baino luzeago jotzen badu ere, bermatuta egongo da Burgoserainoko lotura, gaur egun Burgos eta Valladolid artean bezalaxe, zati berriak eta zaharrak zabalera-aldagailuen bidez konbinatuta».

Ana Oregik azpimarratu du «Frantziak baduela TGVa eta Hendaiatik Bordelera eta Parisa TGVa hartuta joan daiteke. Baina oraingoz Euskal Y abian ez dugunez, ez dago hala joaterik Bilbotik Parisa edo Donostiatik Baionara. Euskal Y bukatzen denean abiadura handiz konektatu ahal izango gara Europarekin, orain isolatuta baikaude. Frantziak gaur egungo traza hobetu asmo du abiadura komertziala handitzeko eta bidaiak laburtzeko, baina ez du abiadura-sare handi berria egin behar, dagoeneko eginda dauka-eta. Oso bestelakoa da egoera Hendaiatik hegoaldera.»

«Euskal Y UIC zabaleran (nazioarteko neurria) eta trafiko mistorako diseinatu da; hartara, Irungo trenbide-muga eta hark eragiten dituen etenak saihestu ahal izango dira. Gehienez 230-250 km/h-ko abiadurarako diseinatu da tren bizkorrenen kasuan, eta 90-110 km/h-ko abiadurarako salgaien trenen kasuan», azaldu du Oregik.

Oregik, bere hitzaldian, azaldu du «bidaiarien zerbitzua hiru hiriburuetako geltokien inguruan pilatuko dela; haien eremu metropolitarretako biztanleriari -1,6 milioi lagun inguru- zuzenduak direnez irisgarritasun handiko tokietan ezarriko dira, bai hirietako biztanleentzat, bai aldirietako biztanleentzat. Horrez gain beste geltoki bat izango da Ezkio-Itsason, Goierri erdian estrategikoki kokatua; hari esker eskualde funtzional hartako herritarrek aise erabili ahal izango dute eta Iruñearekiko lotura ere bertatik egin ahal izango da».

Bidaiaren iraupenari dagokionez, berriz, sare berria abian ipintzen denean Donostia eta Gasteiz artekoak 34 minutu iraungo du (orain, automobilez 70 minutu dira eta trenez berriz, ordu eta erdi luzea). «Donostiatik Parisako bidaia, berriz, -dio Oregik- gaur egun 5ordu eta 35 minutuko bidaia dugu Hendaiatik Parisa bitartean; ezin dugu, gainera, trena Donostian hartu Parisa joateko. Euskal Y-arekin eta Frantzian egiten ari diren bide-hobekuntzarekin, berriz, trena Atotxan hartu eta 3 ordu eta 53 minututan egon gintezke Parisen».

«Eta salgaien trafikoari dagokionez, tren-autobideak Europan zer bilakaera ari diren egiten ikusten dugu; esaterako, Luxenburgotik Montpellierrera bitartekoak 58.000 kamioi garraiatu zituen 2012an. Halaber ikusi dugu Frantziako administrazioak Lille eta Baiona bitarteko tren-autobidea ustiatzeko emakida esleitu berri duela. Tren-autobide horrek Lille eta Gasteiz bitartekoa behar luke, han Arasur-ko eta Jundizko poligonoak eta Forondarako lotunea egonik, eta hori hala izateko modu bakarra dago: Euskal Y», adierazi du Oregik.

Euskotrenek, Eusko Jaurlaritzako Ingurumen eta Lurralde Politika Sailaren esku dagoen Sozietate Publikoak, aldaketak sartuko ditu datorren larunbat arratsaldean, otsailaren 15ean, Zumaiako autobus zerbitzuan, Zumaiako XXX. Herri Lasterketa ospatuko baita. Hori dela eta, Patxita Etxezarreta kalea trafikorako moztu egingo da. Aldaketak eragina izango du Zumaia – Donostia (errepide nagusitik), Zumaia – Donostia (autopistatik) eta Zumaia – Zumarraga lineetan.

Alde batetik, aldaketak sartuko dira Zumaia – Donostia (errepide nagusitik) eta Zumaia – Donostia (autopistatik) linean, arratsaldeko 15:45etik 18:10era, bakarrik. Aldaketa horietan zerbitzurik gabe geratuko dira Txomin Agirreko eta Patxita Etxezarretako geralekuak, eta ondoren adierazten diren zerbitzuen geraleku bakarra tren geltokian egongo da:

• Zumaiako Geltokitik ordu hauetan abiatzen diren autobus zerbitzuak: 16:00etan (errepide nagusitik), 16:30etan (errepide nagusitik), 17:00etan (autopistatik), 17:30etan (errepide nagusitik) eta 18:00etan (autopistatik).

• Donostiatik ordu hauetan abiatzen diren autobus zerbitzuak: 15:00etan (errepide nagusitik), 16:00etan (errepide nagusitik), 16:40etan (autopistatik) eta 17:00etan (errepide nagusitik). Zerbitzu horiek Zumaiako Geltokian amaituko dira.

Zumaia – Zumarraga lineari dagokionez, Patxita Etxezarreta kalean trafikoa moztuta dagoen bitartean, autobusek saihesbidetik zirkulatuko dute, eta ez dira kale horretan geratuko.

Informazio gehiago behar duten erabiltzaileek, EuskoTrenen 902 543 210 informazio telefono zenbakia eta www.euskotren.es web gunea izango dituzte erabilgarri.

Bihar, ostirala, Eusko Jaurlaritzaren egoitzan bilduko dira udalen, aldundien, Estatuko eta Erkidegoko administrazioen ordezkariak, Bizkaiko eta Gipuzkoako portuak eta kostaldea jo dituzten ondoz ondoko denboraleek eragindako kalteak aztertzeko eta konponketa-lanak koordinatzeko.

Ingurumen eta Lurralde Politikako sailburu Ana Oregik aipatutako erakundeak deitu ditu kalteak zenbatesteko, aseguruen bermeak eta babesak zehazteko eta konponketa-lanen plangintza egiteko. Honela azaldu du Izaskun Iriarte Eusko Jaurlaritzako Lurralde Plangintzako sailburuordeak:

• AUDIO MP3 IRIARTE KAIAK:

Bilera goizeko hamarretan hasiko da Eusko Jaurlaritzaren egoitzan, Lakuan.